koi bhula hua yaad aa raha hai
gham-e-derina khae ja raha hai

hazaron zawiye badle nazar ne
zamana mustaqil bal kha raha hai

talluq kuchh nahin jis khub-ru se
rag-e-jaan mein wo basta ja raha hai

khayalon ki munderon par wo aa kar
bala ki chandni barsa raha hai

nazar manzar mein jis ko dhundhti thi
wo dil ki anjuman mein aa raha hai

jise ahl-e-junun kahte hain 'mani'
tadap kar sab ko wo tadpa raha hai