koi chaudhwin-raat ka chand ban kar tumhaare tasawwur mein aaya to hoga kisi se to ki hogi tum ne mohabbat kisi ko gale se lagaya to hoga labon se mohabbat ka jadu jaga ke bhari bazm mein sab se nazren bacha ke nigahon ke raste se dil mein sama ke kisi ne tumhein bhi churaya to hoga tumhaare khayalon ki angnaiyon mein meri yaad ke phul mahke to honge kabhi apni aankhon ke kajal se tum ne mera nam likh kar mitaya to hoga kabhi aaine se nigahen mila kar jo li hogi bharpur angdai tu ne to ghabra ke khud teri angdaiyon ne tere husn ko gudgudaya to hoga nigahon mein sham-e-tamanna jala kar taki hongi tum ne bhi rahen kisi ki kisi ne to wada kiya hoga tum se kisi ne to tum ko rulaya to hoga juda ho gaya hoga jab koi tum se diya hoga jab tum ko dhoka kisi ne hamari wafa yaad aai to hogi hamein apne nazdik paya to hoga