koi diwar na dar khulta hai
par mera azm-e-safar khulta hai

badi mushkil se wo dar khulta hai
ye alag baat magar khulta hai

hum hi diwane bane phirte hain
kab tera zauq-e-nazar khulta hai

man to ro leti hai lekin yaro
kab yahan koi pidar khulta hai

parda-e-ishq hai lazim warna
main idhar aur wo udhar khulta hai

sher-dar-sher kahe jate hain
tab kahin ja ke hunar khulta hai

mere nazdik wo 'abdul-qadir'
pura khul jata hai gar khulta hai