koi jo rahta hai rahne do maslahat ka shikar
chalo ki jashn-e-bahaaran manaenge sab yar

chalo nikhaarenge apne lahu se aariz-e-gul
yahi hai rasm-e-wafa aur manchalon ka shiar

jo zindagi mein hai wo zahr hum bhi pi dalen
chalo hataenge palkon se raston ke khar

yahan to sab hi sitam-dida gham-gazida hain
karega kaun bhala zakhm-ha-e-dil ka shumar

chalo ki aaj rakhi jaegi nihad-e-chaman
chalo ki aaj bahut dost aaenge sar-e-dar