rahin-e-minnat-o-ehsan-e-yar main bhi hun
fareb-khurda-e-fasl-e-bahaar main bhi hun

mujhe bhi lete chalo apne sath diwano
nisar-e-azmat-e-zanjir-o-dar main bhi hun

suna hai rang-e-bahaaran nikharne wala hai
ye dekhne ke liye be-qarar main bhi hun

idhar bhi dekh le ai malika-e-bahaar-e-ghazal
ki teri chah mein ek dil-figar main bhi hun

tere khayal ke dar par jabin-e-dil rakh kar
zamana bit gaya ashk-bar main bhi hun

rukh-e-hayat mein nashtar utarne wale
ye soch le ki tera raazdar main bhi hun

jahan pe sirf mohabbat ka raj hai 'akhtar'
usi dayar ka ek khaksar main bhi hun