koshish zara si ki jo duaon ke sath sath
jalne lage charagh hawaon ke sath sath

nikle bahaar odh ke kuchh khushnuma badan
khushbu bhi ham-safar hai qabaon ke sath sath

chehra-kusha hua hai koi gesuon ke beach
lagne lagi hai dhup bhi chhanw ke sath sath

shahron se mukhtalif hain ye ganw ki ladkiyan
bharti hain gagaren bhi adaon ke sath sath

yun to main is dayar se kuchh bhi na la saka
kuchh khak lag ke aa gai panw ke sath sath