kuchh aaj ilaj-e-dil-e-bimar to kar len
ai jaan-e-jahan aao zara pyar to kar len

munh hum ko lagata hi nahin wo but-e-kafir
kahta hai ye allah se inkar to kar len

samjhe hue hain kaam nikalta hai junun se
kuchh tajraba-e-subha-o-zunnar to kar len

sau jaan se ho jaunga raazi main saza par
pahle wo mujhe apna gunahgar to kar len

haj se hamein inkar nahin hazrat-e-waiz
tauf-e-haram-e-kucha-e-dildar to kar len

manzur wo kyon karne lage dawat-e-'akbar'
khair is se hai kya bahas hum israr to kar len