kuchh aisa rabt musalsal raha shuur se bhi
ki khauf aane laga ishq ke wafur se bhi

wo shash-jahat se yaksan dikhai deta hai
use qarib se dekha hai aur dur se bhi

hamara ishq haqiqat mein ghaar-e-saur-o-hira
agarche khas aqidat hamein hai tur se bhi

suna hai khas talluq hai kharjiyat ka
hamari zat ke kuchh dakhli umur se bhi

tabhi to zehn pe hawi hai ishq-e-sahrai
azal se dil ke marasim rahe khajur se bhi

ye aur baat hai mano ki ikhtilaf karo
nishaniyan to hazaron milin zabur se bhi

lahu mein raqs-kunan ishq hai mere 'faisal'
juda hua hai koi silsila qusur se bhi