kuchh aise tere badan ka yahan nishan khulega
ki jis tarah se samundar mein baadban khulega

ye sochte hi mere hath-paon phul gae
mera nishan kahani mein kab kahan khulega

guzarte waqt kisi ko khabar nahin thi yahan
ki ek dam se dilon par ye khak-dan khulega

main daen-baen kisi aur samt bhi dekhun
kise khabar ki kahan se ye darmiyan khulega

yahan ye kaun tujhe yaad rakkhega ai 'aziz'
ki tere baad hi ye zikr-e-dostan khulega