kuchh aur dil-lagi nahin us bad-nasib se
hum jaante hain khelte ho tum raqib se

main bad-gumaniyon ka bhi mamnun ho gaya
wo haal puchh lete hain mera tabib se

dushman banae hain meri qismat ne sainkadon
chaha hai tujh ko khalq ne mere nasib se

ai naseh-e-shafiq rahe kuchh to chhed-chhad
zikr-e-habib kam nahin wasl-e-habib se

manind-e-barq misl-e-hawa surat-e-nigah
aksar nikal gae hain wo mere qarib se

puchho janab-e-'dagh' ki hum se shararaten
kya sar jhukae baithe hain hazrat gharib se