kuchh band makan bhi rahne den
kuchh raaz nihan bhi rahne den

har samt jagae hain mahshar
kuchh amn-o-aman bhi rahne den

hain jalte dip qayaadat ke
qadmon ke nishan bhi rahne den

deta hai gawahi ibrat ki
uthta ye dhuan bhi rahne den

hai garm lahu diwanon ka
maqtal ke nishan bhi rahne den

khud said jo chal kar aae hain
ab tir-o-kaman bhi rahne den

khud par hi bharosa 'rag' rakhen
ummid jawan bhi rahne den