kuchh e'timad ka lahja bhi fikr-o-fan se mila
ye silsila to mujhe 'mir' ke sukhan se mila

bikhar bikhar ke main simta hun ek markaz par
ye hausla to mujhe tere husn-e-zan se mila

ajib taur se tu ne sada lagai thi
bas ek karb-e-musalsal tere sukhan se mila

tera khayal mujhe dastaken to deta tha
tera pata mujhe khushbu-e-pairahan se mila

main bujh gaya tha sawad-e-dayar-e-zulmat mein
charagh-e-rah to ummid ki kiran se mila

bhatak raha tha 'majidi' shab-e-judai mein
charagh-e-zist mujhe husn-e-gul-badan se mila