kuchh is bala ka tera rabt-ashna hona
ki har jafa ka ba-andaza-e-wafa hona

sitam-shiar teri aarzu pe kya mauquf
kisi khalish ka gawara nahin juda hona

jahan mein phir na kahin wajh-e-rashk ho jae
tere karam se mera murid-e-jafa hona

gudaz ishq se mamur kar diya mujh ko
muhaal hai tere ehsan se ada hona

wo shauq mein tere izhaar-e-naz ka aaghaz
wo mere haal pe har jaur ka rawa hona

hua wo dad-e-wafa chahne pe kyon barham
koi gunah na tha talib-e-jaza hona

shab-e-firaq wo halki si ek shua-e-umid
wo subh tak mere jine ka aasra hona

bisat-e-dahr pe aasan nahin hai kuchh 'hirman'
teri nigah ke aalam se aashna hona