kuchh iztirab hi rahta to kitna achchha tha
wo khwab khwab hi rahta to kitna achchha tha

chhupa ke zat ke pahlu bhi kya mila hai mujhe
khuli kitab hi rahta to kitna achchha tha

takallufat mein tha to bade sukun mein tha
wo ji janab hi rahta to kitna achchha tha

tamam umr main kirdar ko nibhata raha
zara kharab hi rahta to kitna achchha tha

sawal kar ke wo sharminda ho gaya 'babar'
tu la-jawab hi rahta to kitna achchha tha