kuchh koh-kan jo waqf-e-zar-o-mal ho gae
tesha-ba-dast ho ke bhi kangal ho gae

nam-o-numud izzat-o-shohrat kamal-o-fan
ye sab to meri rah ke janjal ho gae

kal tak katora le ke jo phirte the dar-ba-dar
kaise wo ek raat mein khush-haal ho gae

ek shakhs ke na hone se viran hai shahr shahr
sunsan ganw ganw ke chaupal ho gae

tufan sitam ke tir chalata hi rah gaya
patjhad ke din shajar ke liye dhaal ho gae

kya khairiyat 'fahim' ki ab lene aae ho
us ko mare hue to kai sal ho gae