kya karoge bachaw suraj ka
jaante ho subhaw suraj ka

garm hai wo to kam nahin hum bhi
kaun sahta hai tao suraj ka

mere ghar ka charagh bujhte hi
chadh gaya kitna bhaw suraj ka

surmai sham aae kamre mein
ab to parda hatao suraj ka

raat se jang kar ke aaya hai
taza taza hai ghaw suraj ka

milne jata hai raat se chhup kar
ek fasana banao suraj ka

aasmanon se dosti kar ke
badh gaya hai tanaw suraj ka

ho gai sham sochte kya ho
ab janaza uthao suraj ka

raat bhar munh chhupae phirta raha
kam nahin phir bhi tao suraj ka

roz dariya kinare baith ke hum
jodte hain ghatao suraj ka

jugnuon se muqabla tha 'fahim'
kaun karta bachao suraj ka