kuchh tere intizar ne mara
kuchh dil-e-be-qarar ne mara

kuchh gham-e-dil ne kar diya majbur
kuchh gham-e-rozgar ne mara

the khizan mein bhi mutmain hum log
hum ko rangin bahaar ne mara

nargis-e-ashk-bar ki saugand
gesu-e-tabdar ne mara

do qadam rah gae the manzil ko
khizr ke eatibar ne mara

yun bhi dushwar thi na manzil-e-ishq
zist ke karobar ne mara

aap ko hazrat-e-'saharwardi'
ranjish-e-be-shumar ne mara