kunj-e-dil mein teri chahat ke siwa kuchh bhi nahin
aaina-khana mein hairat ke siwa kuchh bhi nahin

har qadam par muntazir majburiyan mahrumiyan
zindagi khush-nam tohmat ke siwa kuchh bhi nahin

puchhte kya ho maal-e-amad-e-fasl-e-bahaar
sara gulshan naqsh-e-ibrat ke siwa kuchh bhi nahin

gardish-e-ayyam to nahaq pasheman ho gai
muskurana meri aadat ke siwa kuchh bhi nahin

ai 'qamar' ab ja raha hun pur-sukun ek ganw mein
ab to mere pas fursat ke siwa kuchh bhi nahin