kya dekhen hum suraj chand sitaron mein
un ka chehra raushan hai andhiyaron mein

roz tumhaari khabren padhte rahte hain
tum to bas ab milte ho akhbaron mein

darwaze par nam tumhaara likkha hai
naqsh tumhaare sabt hue diwaron mein

bachche khauf se ghar se bahar na niklen
dhul udti hai galiyon mein chaubaron mein

apne jaisi fani chiz banata hai
ek ye kami hai insan ke shahkaron mein

peshani par dagh numayan rahta hai
sajde karte phirte hain darbaron mein

ilm hunar aur fan to ab matruk hue
khote sikke chalte hain bazaron mein

ahd-e-nau ki 'nuzhat' hum buniyaad rakhen
fikr nai ab shamil ho fan-paron mein