kya jaane kahan le gai tanhai hamari
muddat hui kuchh bhi na khabar aai hamari

is dasht-e-gum-asar mein aane ke nahin hum
hai aur kahin baadiya-paimai hamari

is rah se hum bach ke nikal aae wagarna
baithi thi kamin-gah mein ruswai hamari

rah rah ke jo taswir chamakti hai faza mein
hum us ke hain shaidai wo shaidai hamari

dil baithne lagta hai yahi soch ke ab bhi
phir raat tabiat nahin ghabrai hamari

ab khak-e-nadamat se utthen bhi to kahan jaen
honi hi nahin jab kahin shunawai hamari

ek dil ke taqaze ki hi takmil hai warna
kya arz-e-hunar kya sukhan-arai hamari