kya kahen tum se shab-e-gham hum pe kya kya ho gaya
dil pighal kar bah gaya pani kaleja ho gaya

zikr-e-chashm-e-mast se mera kharaba ho gaya
mai-kade tak bhi nahin pahuncha ki ruswa ho gaya

mujib-e-khiffat hai aalam mein tajarrud-peshgi
main subuk-sar-e-mohabbat ho ke halka ho gaya

jalwa-e-ahl-e-safa hai tira-bakhton par wabaal
din jahan nikla ki murgh-e-shappar andha ho gaya

arsh-e-azam par rahe kyunkar na majnun ka dimagh
lailat-ul-mearaj rang-e-zulf-e-laila ho gaya

khwab mein bhi hai tasawwur shokh-chashmon ka hamein
bistar-e-aram apna mirg-chhaala ho gaya

in pari-zadon ke kuche mein tamashe ki hai baat
jo tamasha dekhne aaya tamasha ho gaya