kya khabar thi inqalab aasman ho jaega
qorma qaliya nasib-e-ahmaqan ho jaega

zulmat-e-baatil ke daman mein chhupega nur-e-haq
dal ki aaghosh mein qima nihan ho jaega

cake biscuit khaenge ullu-ke-patthe raat din
aur sharifon ke liye aata giran ho jaega

control us ke lab-e-shirin pe gar yun hi raha
khand ka sharbat nasib-e-dushmanan ho jaega

ai bhune titar na dar bawarchiyon ki qaid se
pet mera teri khatir aashiyan ho jaega

ai sikandar murgh ka hai shorba aab-e-hayat
khizr bhi is ko agar pi le jawan ho jaega

jab ye kahta hun ki kuchh saman-e-dawat kijiye
wo ye kah kar tal dete hain ki han ho jaega