kya khinche hai khud ko dur allah
allah-re tera ghurur allah

husn aisa kahan hai mahr-o-mah mein
kuchh aur hi hai ye nur allah

hum ne to ba-chashm-e-khwesh dekha
har shai mein tera zuhur allah

hum hain tere bande mere sahib
go shaikh ko dewe hur allah

pahlu se mere nikal gaya but
kya mujh se hua qusur allah

jis dam mein karun hun nala dil se
uthta hai kitna shor allah

ai 'mushafi' haq nahin samajhta
kitna hun main be-shuur allah