kya tujh ko bataen ai hamdam kya hashr ka saman hota hai
jab ishq ki jaan par banti hai jab husn pasheman hota hai

jo aankh se aansu bahta hai wo nang-e-gham-e-jaan hota hai
wo ashk guhar kahlata hai palkon pe jo raqsan hota hai

kya kya na ba-nam-e-lutf-o-karam ai gardish-e-dauran hota hai
takhrib ke saman hote hain tamir ka unwan hota hai

kya tujh ko khabar hai ai naseh kya chiz mohabbat hoti hai
kyunkar shab-e-furqat katti hai aur kya gham-e-hijran hota hai

ai ahl-e-chaman ab tum hi kaho ye kar-e-junun pesha to nahin
tanzim-e-nasheman hoti hai barbaad gulistan hota hai

barbaad jafaon ki aandhi yun hosh udati hai mere
jis tarah hawa se ek aanchal gulshan mein pareshan hota hai

kuchh dard wafa ki rahon mein hamrah wo chalte to hain magar
ho jate hain ojhal nazron se ek mod numayan hota hai

us zakhm ki lazzat kya ho bayan us dard ka aalam kya kahiye
jis waqt kisi ka tir-e-nazar paiwast-e-rag-e-jaan hota hai

mana ki bhanwar mein kashti hai aur yurish-e-tufan bhi hai magar
kya khauf 'kamal' ab maujon ka allah nigahban hota hai