kya wasl ki ummid mere dil ko kabhi ho
us shokh ki taswir bhi jab mujh se khinchi ho

mujh ko na bulate hain na aate hain mere ghar
afsos hai un se na yahi ho na wahi ho

ai pir-e-mughan mujh ko tere sar ki qasam hai
tauba to kahan tauba ki niyyat bhi jo ki ho

wo mujh se ye kahte hain ki mahshar ko milunga
main un se ye kahta hun ki jo kuchh ho abhi ho

ai 'nuh' hamein ishq mein parwa nahin is ki
aazar ho ya lutf ho gham ho ki khushi ho