kya zist aab-o-rang ka dhoka kahen jise
ahl-e-nigah khwab-e-zulekha kahen jise

kam-maigi-e-jurat-e-didar ki qasam
dekha hai yun unhen ki na dekha kahen jise

ek umr ke talatum-e-jazbaat ka nichod
palkon pe hai wo bund ki dariya kahen jise

hasrat bhari nazar ne unhen dekh dekh kar
aisa bana liya hai ki apna kahen jise

ek qalb-e-muztarib ki labaalab hai misl-e-jam
ek chashm-e-baada-rez ki mina kahen jise

aankhon pe kya ho ahl-e-basirat ko eatibar
wo jalwagi hai aaj ki parda kahen jise

nazzara-hae-husn ka hasil na puchhiye
ek khirgi mataa-e-tamasha kahen jise

kis ki nazar ka fitna-e-shorish-pasand hai
ye mahshar-e-hayat ki duniya kahen jise

bakhshi hai dil ke zakhm ko tere khayal ne
wo tazgi ki jaan-e-tamanna kahen jise

nala yahi hai jab to asar ka sawal kya
ek aisi kaifiyat hai ki naghma kahen jise

phaile to kaenat hai simte to ek nigah
ye naz-e-husn ek kinaya kahen jise

zarra bhi naz karta hai apne wajud par
mutthi mein hai wo chiz ki sahra kahen jise

ba in hama numud-e-sharar zindagi hai kya
ek khel aab-o-gil ka tamasha kahen jise

ek tifl-e-sada-dil ke gharaunde ki tarah hai
'safdar' ye musht-e-khak ki duniya kahen jise