kyon khatakta hai mera teri nazar mein rahna
gard pairon ki bhi ye chahe ki sar mein rahna

dil-e-pur-shauq mubarak ho nazar mein rahna
kis ki taqdir mein hai prem-nagar mein rahna

dil-e-barbaad mein hasrat bhi nahin hai koi
kis ko manzur hai ujde hue ghar mein rahna

gir ke nazron se na mil jae tu mitti mein kahin
ashk-e-gham tujh ko qasam dida-e-tar mein rahna

mujh pe kya waqt ye aaya hai watan mein logo
ghar mein rahte hue aasan nahin ghar mein rahna

ishq gar ras na aaya to kahan husn-e-jamil
kya mayassar ho hasinon ke nagar mein rahna