kyon na aane ki baat karte ho
dil dukhane ki baat karte ho

dil lagane ki baat karte ho
kis fasane ki baat karte ho

ye kaho khud bhula diya tum ne
kyon zamane ki baat karte ho

kaun waiz sune tumhaari baat
kab thikane ki baat karte ho

sim-tan lal lab guhar dandan
kis khazane ki baat karte ho

tum abhi aa ke bhi nahin baithe
aur jaane ki baat karte ho

bazm-e-hasti ujadne walo
kyon sajaane ki baat karte ho

kuchh nahin jis mein hasraton ke siwa
us zamane ki baat karte ho

bhulna bas mein jo nahin ai 'zubair'
wo bhulane ki baat karte ho