kyun gham-e-raftagan kare koi
fikr-e-wamandgan kare koi

tere aawargan-e-ghurbat ko
shamil karwan kare koi

zindagi ke azab kya kam hain
kyun gham-e-la-makan kare koi

dil tapakne laga hai aankhon se
ab kise raazdan kare koi

us chaman mein ba-rang-e-nikhat-e-gul
umr kyun raegan kare koi

shahr mein shor ghar mein tanhai
dil ki baaten kahan kare koi

ye kharabe zarur chamkenge
e'tibar-e-khizan kare koi