kyun lage hai mujh ko aksar ye jahan dekha hua
chand suraj kahkashaen aasman dekha hua

dekha hai jab se tumhein lagta hai kuchh dekha nahin
zoam tha mujh ko ki hai sara jahan dekha hua

tum mujhe hairan bhi kar sakte ho socha na tha
aisa chehra aankh ne tha hi kahan dekha hua

dekh rakkhe dosti ke nam par dhoke bahut
ishq mein bhi dil ko main ne bad-guman dekha hua

jis ke bais ek chakori chand ki jaanib ude
hum ne 'gauhar' hai wo jazb-e-ashiqan dekha hua