lab-e-khamosh mein pinhan hai koi raaz nahin
zindagi saz hai jis mein koi aawaz nahin

kyun na aaghosh-e-takhaiyul mein main udta hi rahun
dar-haqiqat hai mujhe khwahish-e-parwaz nahin

mere kirdar mein hai neki badi par bhaari
kyun wo kar pae badi ko nazar-andaz nahin

ye talluq jo kiya qata hua qissa tamam
ye nai dastan ka nuqta-e-aghaz nahin

ru-ba-ru aaine ke jaun to dikhta hai mujhe
ajnabi shakhs jo ham-shakl-o-ham-awaz nahin

hun to hargiz nahin paband-e-qawaed 'naqid'
apni aawargi pe mujh ko magar naz nahin