lab-e-rangin hain tere rashk-e-aqiq-e-yamani
zeb deti hai tujhe nam-e-khuda kam-sukhani

haar kal pahne the phulon ke nishan hai ab tak
khatm hai gul-badanon mein teri nazuk-badani

sharm se aab hue nishkar-o-qand-o-nabaat
dekh kar ai shakarin-lab teri shirin-dahni

mewa-e-bagh-e-iram us ko na bhawe hargiz
taubar-e-bosa kiya jis ne wo seb-e-zaqni

jhute wade tere ai jaan karun sab bawar
dil shikasta na kare gar teri paiman-shikani

shama-ruyon se jise sham-o-sahar sohbat ho
hai saza-war use dawa-e-khush-anjumani

is qadar mahke hai us kakul-e-mushkin ki shamim
justuju mein hue 'bedar' ghazal-e-khutani