ladkhadati hawa roz kahti hai kya shahr walo suno
ek pauda koi aaj phir jal gaya shahr walo suno

aa gae ret ke dher diwar tak balki bazar tak
dasht ke hath likh den na phir faisla shahr walo suno

kya sitam-khez ujalon se achchhe hamare andhere nahin
jangalon ne tumhein kya nahin kah diya shahr walo suno

koi tum mein yazid aur shabbir hai kis ki taqsir hai
log kahne lage shahr ko karbala shahr walo suno

khak munh mein mere hum pe kya koi taza bala aaegi
ro raha hai bahut din se koh-e-nida shahr walo suno

phul ban kar khilo koi khushbu bano kuchh mudawa karo
kah rahi hai falak na-rasida dua shahr walo suno