ladte hue duniya ki zarurat ke liye hum
mar jaenge ek roz mohabbat ke liye hum

rakkhe nahin hum se koi ikhlas ki ummid
bazar mein baithe hain tijarat ke liye hum

daulat na siyasat na qayaadat na hukumat
mujrim hain faqat apni jihaalat ke liye hum

duniya ke har ek lutf ko hum chhod den waiz
itne bhi pareshan nahin jannat ke liye hum

hindi ki hifazat ke liye jaise the 'raskhan'
waise hi hain urdu ki hifazat ke liye hum

aise hi to talwar uthate bhi nahin hai
majbur hue honge baghawat ke liye hum

jo haal tha pahle wahi hai haal abhi bhi
kuchh bhi nahin kar pae mohabbat ke liye hum