koi kitna bhi kahe shad nahin hota hai
ek luta dil kabhi aabaad nahin hota hai

paida hote hain faqat ishq ki khatir do chaar
har koi majnun ya farhad nahin hota hai

hota aaya hai sada zakhm hi pahle ijad
pahle marham kabhi ijad nahin hota hai

zindagi apna sabaq aur zara mushkil kar
hum ko aasan sabaq yaad nahin hota hai

ab har ek baat pe hota hai faqat wa'da-wa'id
ab kisi baat pe samwad nahin hota hai

kaise us shakhs pe lanat nahin bheje koi
ishq kar ke bhi jo barbaad nahin hota hai

aise jallad se hai asl mein khatra sab ko
apne peshe se jo jallad nahin hota hai

hum mohabbat bhala kya khak karenge jaana
hum se to kuchh bhi tere baad nahin hota hai

padh lo tarikh jo ek bar hua mulk ghulam
phir wo aasani se aazad nahin hota hai