lahu ki aag agar jalti rahegi
hamari dal bhi galti rahegi

bharosa hai agar duniya ko hum par
hamare rang mein dhalti rahegi

mohabbat hai agar sachchi hamari
mata-e-khwab par palti rahegi

chaman ab der tak raqsan rahega
hawa ab der tak chalti rahegi

kahan aaegi apne waqt par maut
wo agle roz par talti rahegi

jahan mein surkh-ru ho kar bhi 'sajid'
wo hathon ko yunhi malti rahegi