lazzat-e-did ka chaska hai to aa dekh mujhe
sahab-e-dida-e-bina hai to aa dekh mujhe

meri surat hai tamasha-gah-e-yas-o-ummid
gar tujhe shauq-e-tamasha hai to aa dekh mujhe

sab meri baat pe kahte hain ki mukhtal hai dimagh
tujh ko diwanon ka sauda hai to aa dekh mujhe

mujh se bhi barsar-e-paikar hai qismat meri
dekhna jang ka naqsha hai to aa dekh mujhe

rabiya hai maraz-e-gham se bura haal mera
gar mizaj aaj-kal achchha hai to aa dekh mujhe

log puchhenge meri surat-o-sirat tujh se
munh kisi ko jo dikhana hai to aa dekh mujhe