lazzat-e-girya se bhi dil ki khalish kam to nahin
ashk gauhar hi sahi zakhm ka marham to nahin

ye bhi mumkin hai gham-e-hijr gham-e-dahr bane
mushkilen ishq ki sang-e-rah-e-adam to nahin

gham ata karke na samjho ki mujhe shad kiya
dil mein sab kuchh hai magar hausla-e-gham to nahin

karwan aur chale aur chale aur chale
rahnuma sahib-e-manzil hai magar hum to nahin

chehra-e-shab pe kuchh anwar-e-sahar hain lekin
hum jis ummid mein jage the wo aalam to nahin