log jam-o-subu mein khoe rahe
hum teri aarzu mein khoe rahe

zindagi ki thi justuju hum ko
umr bhar justuju mein khoe rahe

mahfil-e-rang-o-bu to mil na saki
khwahish-e-rang-o-bu mein khoe rahe

ashk jo bach rahe the aankhon mein
hurmat-e-abru mein khoe rahe

har taraf tha hisar kanton ka
phul fikr-e-numu mein khoe rahe

kya tasawwur tha chashm-e-saqi ka
raat bhar hum subu mein khoe rahe

shauq-e-awargi na puchh 'ziya'
lazzat-e-ku-ba-ku mein khoe rahe