khayal-o-khwab ki duniya se istifada kiya
hunar samajh ke isi kaam ko ziyaada kiya

ye tu ne kaun se mansab ki pasdari ki
banaya mir mujhe khud ko mirzada kiya

kamal ye ki jise rasta mila hi nahin
wo kah raha hai safar hum ne pa-piyaada kiya

koi batao ki main khud ko rokta kaise
jab us ne sath mere chalne ka irada kiya

bahut dinon pe tabiat udhar hui mail
bahut dinon pe saba ne bhi dil kushada kiya