lutne walo dil-e-barbaad ki tauqir na jae
ghar chala jae magar hasrat-e-ta’mir na jae

shahr-e-nau qil’a-e-dil kaisa khandar hai ki jahan
koi sayyah na aae koi rahgir na jae

main to khud khwabon ko ta'bir se kar dun mahrum
khwab aise hain ki jin se gham-e-ta'bir na jae

shahr se qafile laute hain ye kahte su-e-dasht
is kharabe mein koi sahab-e-tauqir na jae

jaane kis sho'le se gundhi gai mitti meri
aandhiyan chalti rahin khak ki tanwir na jae