ma-siwa se kahin begana banaya hota
apne hi husn ka diwana banaya hota

jam saghar subu khum-khana banaya hota
zarf-e-dil dekh ke paimana banaya hota

lau lagata na kisi ghair se ai sham-e-husn
tum ne gar apna hi parwana banaya hota

meri mahrumi-e-qismat ko jo sun pata raqib
utni hi baat ka afsana banaya hota

pahle allah mujhe zabt ki quwwat deta
phir rahin-e-gham-e-jaanana na banaya hota

un ke hathon pe pahunchne ka sharaf hi milta
meri mitti se jo paimana banaya hota

kash allah ka ghar jaan ke 'shoala' tum ne
kaba-e-dil ko kalisa na banaya hota