maal-e-dil ke liye aaj yun khudi tarse ki zindagi ke liye jaise zindagi tarse khirad-ba-dosh hai tahzib-e-nau magar phir bhi junun-ba-daman tamaddun ko aagahi tarse jo apna khun-e-jigar pi ke mast ho jaen ab aise zarf-paraston ko tishnagi tarse hai ab bhi silsila-e-dosti jahan mein magar wafa-shanas mohabbat ko dosti tarse maqam-e-zabt gham-e-ishq mein wo paida kar ki tu khushi ko na tarse tujhe khushi tarse rah-e-wafa mein mujhe kash aisi maut mile ki baad-e-marg mujhe meri zindagi tarse jahan mein ahl-e-sukhan kam nahin magar 'hamid' takhayyulat-e-haqiqat ko shairi tarse