mabda-e-husn se kaise ye juda hai yaksar
ki zaman aur makan ek ada hai yaksar

ye jo di hai hamein aazadi-e-afkar-o-amal
koi batlao jaza hai ki saza hai yaksar

waqt hai tesha-o-shamshir ka jis mein kab se
wo hatheli abhi masruf-e-dua hai yaksar

marhaba jashn-e-jibillat ki nahin hum paband
marhaba zist ki aazad-e-haya hai yaksar

baat kahne ko hai kuchh aur jahan ka mamduh
baal-e-jibril nahin baal-e-huma hai yaksar

tu samajhta hai jise apna muizz-o-razzaq
hum samajhte hain wahi tera khuda hai yaksar

aaj jo fitrat-e-adam nazar aati hai hamein
ye meri jaan zamane ki hua hai yaksar

mamba-e-faiz se aati hai jo rahmat yan tak
ye hamein aal-e-mohammad ki ata hai yaksar

khaliq-e-khatm-e-rusul aal-e-eba ka masjud
apna masjud magar aal-e-eba hai yaksar