mahakte mithe mastane zamane
kab aaenge wo man-mane zamane

jo mere kunj-e-dil mein gunjte hain
nahin dekhe wo duniya ne zamane

teri palkon ki jumbish se jo tapka
usi ek pal ke afsane zamane

teri sanson ki saughaten bahaaren
teri nazron ke nazrane zamane

kabhi to meri duniya se bhi guzro
liye aankhon mein anjaane zamane

unhi ki zindagi jo chal pade hain
teri maujon se takrane zamane

main fikr-e-raaz-e-hasti ka parastar
meri tasbih ke dane zamane