mahfil-faroz jalwa-e-jaanana ho chuka
diwana dil ko hona tha diwana ho chuka

sikhe teri nigah se aadab-e-khamushi
ab mujh se koi nara-e-mastana ho chuka

bikhre chaman mein phul to aata hai mujh ko yaad
wo mausam-e-bahaar ki afsana ho chuka

us bad-nasib ko kahin milti nahin panah
jo teri bargah se begana ho chuka

aaya hamare jine ka andaz sab ko yaad
jab zikr-e-jaan-nisari-e-parwana ho chuka

kuchh roz aastan-e-dar-e-yar bhi sahi
'abid' tawaf-e-kaba-o-but-khana ho chuka