mahfil mein ghair hi ko na har bar dekhna
meri taraf bhi bhul ke sarkar dekhna

aaghaz-e-sabza se hai jo rukhsar par ghubar
agle baras ise khat-e-gulzar dekhna

jab sarf-e-guftugu hun to dekhe unhen koi
manzur ho jo abr-e-guhar-bar dekhna

main ne kaha ki hijr mein kuchh mashghala nahin
bole ki raat din dar-o-diwar dekhna

kahta hun jab main un se banaw-singhaar ko
kahte hain koi aur trahdar dekhna

main jaan bhi daregh karun to gunahgar
mere siwa na aur kharidar dekhna

wo mujh se puchhte hain ki kuchh aib to nahin
raftar dekhna meri guftar dekhna

shaikh-e-zaman qadim rawish ke buzurg hain
kitna bada hai gumbad-e-dastar dekhna

wo bar bar dekhte hain aaine mein munh
allah un ka ru-e-pur-anwar dekhna

chalte hain ku-e-yar mein hai waqt-e-imtihan
himmat na haarna dil-e-bimar dekhna

hoshiyar phunk phunk ke rakhna yahan qadam
'parwin' zara zamane ki raftar dekhna