mahw kar dali kisi ne dil se meri yaad tak
ho nahin sakti magar is zulm par fariyaad tak

wahshaten itni badhi hain karobar-e-shauq mein
dur mujh se bhagta hai ab mera ham-zad tak

teri meri laghzishon par hi kahan mauquf hai
baat chal nikli to phir jaegi ye ajdad tak

sochta hun kya karenge indimal-e-dard-e-dil
ghaur se sunte nahin hain jo meri rudad tak

ban gae insan apni zat mein jangal 'munir'
ud gai hai bastiyon se bu-e-adam-zad tak