main ki apne hi aas-pas nahin
so bhi ab mujh ko teri aas nahin

zindagi ke bane nahin imkan
maut ka bhi koi qayas nahin

qahr par qahr mujh pe tute hain
kya sitam hai ki main udas nahin

chahta hun ki tujh ko yaad rakhun
par ye chahat bhi utni khas nahin

rah ke duniya mein duniya walon se
kahta phirta hun duniya ras nahin

meri khwahish hai dariya pas aae
aur main kah dun ki mujh ko pyas nahin