main shakh shakh pe mahka kiran kiran mein raha
ki ruh ban ke raha main jis anjuman mein raha

asir-e-kashmakash-e-daur-e-pur-mehan mein raha
wo aaftab hun jo muddaton gahan mein raha

khulus-e-ishq ki mahrumiyan maaz-allah
main umr bhar tahi-daman bhare chaman mein raha

nigah mahw-e-tamasha labon pe mohar-e-sukut
main aaine ki tarah teri anjuman mein raha

kisi se ahd-e-mohabbat pe jab bhi ghaur kiya
ek irtiash sa pahron mere badan mein raha

tere baghair kahin bhi to ji bahal na saka
main chain se kabhi ghar mein raha na ban mein raha

muhib itna ki wo jalwa barq-e-tur bana
latif itna ki phulon ke pairahan mein raha

zaban salis bayan dil-nawaz fikr jamil
ye ehtimam hamesha mere sukhan mein raha

wo doston ke azaem se 'zabt' kya bachta
jo dushmanon ki taraf se bhi husn-e-zan mein raha